அவளுக்கு
மூன்று கண்கள் இருந்திருக்கலாம்
மூன்று கைகள்
அல்லது
ஆறு கால்கள் இருந்திருக்கலாம்
அவள் படித்திருந்தாள்
அழகுற்று அறிவுற்றிருந்தாள்
நாணிச் சமையும்
தேனிலவு முகமுடையாள் என்றாலும்
அவளுக்கு
இரண்டு தலையாவது இருந்திருக்கலாம்.
அதனால்
அவளை நிராகரித்திருக்கலாம்.
நூறு பவுன் போடமுடியாத
குடும்பத்துப் பொண்ணு
என்ற
நிராகரிப்பை விட
இது நன்றாக இருந்திருக்கும்
- ஷா
இந்த
நள்ளிரவில் தனியாக
ஒரு நாற்காலியில்
அமர்ந்து எழுதிக்கொண்டிருக்கும்
எனக்கு
ஒரு சிகரெட்
கொஞ்சம் பிராந்தி
ஒரு சாம்பல் தட்டு
பேசுவதற்கு ஒருவன்
போதும்
அவன் போனால்
இன்னொருவன்
அவர்களுடன்
நழுவிச் செல்லும்
நினைவுகளைக் காண
துரத்திக்கொண்டே செல்கிறேன்
இன்னும் வெகுதூரம்
சென்று
யாருமற்றவனாய்
திரும்பி வந்து
என்னை விட்டு விலகக்
காத்திருக்கிறேன்
காலுக்கடியில் சாவகாசமாய்
அமர்ந்திருக்கும்
பூனை மெல்ல
எட்டிப் பார்க்கிறது...
- ஷா
ஒற்றயைறை வீ்ட்டுத் தொட்டிலில் எதையோ நினைத்து
தூக்கத்தில் சிரிக்கிறது
குழந்தை
கனவில் வந்த
கடவுளாக இருக்கலாம் என்றாள்
அவள்
அவனோ
அதெல்லாம் ஒன்றுமில்லை வா என்றான்
குழந்தையின் உறக்கம்
உறுதியாகும்வரை
காத்திருந்தவர்களது
முதல் முத்தலிலேயே
மீண்டும்
சிரித்தது குழந்தை!
- ஷா
